中環出更：為服務業發聲 傑青組聯盟

清潔、保安、廢物處理等行業，向來予人「垃圾佬」、「看更佬」、「回收佬」形象，社會地位低微。相關行業的七大商會近日組成「香港服務業聯盟」（下稱「聯盟」），凝聚從業員，為業界發聲。開設清潔公司嘅十大傑青甄韋喬（Mickey）牽頭成立商會，拉埋兒子甄偲瀚（Aaron）擔任青委。首屆就職禮日前舉行，官員、立法會議員及菁英會眾兄弟現身捧場。

甄韋喬（右二）與三位業界老闆潘建良（左二）、黃輝成（左一）及陳國輝（右一）齊成立香港服務業聯盟。

清潔保安常遭忽略
聯盟成員來自清潔、環保、設施管理及保安界從業員，為數不少。Mickey話，業界一直被人忽略，認為佢哋「低學歷」、「無知識」，但隨着政府將實施標準工時及廢物徵費等政策，業界意識到不可再單打獨鬥，所以成立聯盟，爭取共同訴求。

聯盟成立大喜之日，同為傑青嘅余嫿送上生日禮物，操刀為聯盟設計徽標，用上紅、黃、藍綠色，繽紛色彩寓意齊發揮團結力量。

佔領行動堵路逾三星期，聯盟成員都怨聲載道。Mickey話，部分清潔工人進入佔領區收垃圾亦遇到阻撓，幸好情況已有改善，否則垃圾堆積如山，恐影響公共衞生。至於保安業都大叫頭痕，事關有位於佔領區的商場老闆擔心衝突一觸即發，要求經理級的保安員二十四小時當更，人手編更上出現困難。

太子爺一樣要落手
講番就職禮，當中有唔少生力軍，Mickey公子Aaron都係其中一員。畢業於美國名校嘅Aaron現時在爸爸公司幫手，貴為太子爺一樣要幫手掃地、通渠、入屋滅蟲、執垃圾等。有客人見佢咁後生，苦勸佢轉行，但Aaron一心只想繼承父親衣鉢。

傑青余嫿絞盡腦汁，為聯盟設計徽標。

佔領行動衝擊零售業，菁英會榮譽主席白富鴻（左）嘆燕窩生意下跌兩成，睇嚟菁英會主席梁宏正（右）要在青年工作方面諗諗計喇。

資料來源: 東方要聞港聞 2014年10月23日 (四)